«Hamkorbank» ATB MKO‘Bni moliyalashtirish dasturi natijalariga bag‘ishlangan tadbirda ishtirok etdi
Germaniya va O‘zbekiston o‘rtasidagi moliyaviy hamkorlik doirasida amalga oshirilayotgan, KfW taraqqiyot banki tomonidan qo‘llab-quvvatlanadigan dastur mikro, kichik va o‘rta biznesni moliyalashtirish imkoniyatlarini kengaytirishga qaratilgan. Dastur O‘zbekiston Respublikasi Qishloq xo‘jaligi vazirligi tomonidan ISCAD orqali boshqariladi, xalqaro Business & Finance Consulting (BFC) konsalting kompaniyasi esa uni amalga oshirishda ISCAD bilan hamkorlik qiladi.
Dastur doirasida hamkor banklar orqali mikro, kichik va o‘rta biznesni moliyalashtirish uchun 26,77 million yevro yo‘naltirildi. Tadbirda ishtirokchilar ushbu mablag‘larning dastur doirasidagi o‘rnini, hamkor banklar tajribasini va tadbirkorlikni moliyalashtirishni yanada rivojlantirish masalalarini muhokama qildilar.
«Hamkorbank» ATB vakili, MKO‘B departamenti direktor o‘rinbosari Sohibjon Matyoqubov tadbirning «Banking from the MSME Lens» panel muhokamasida qatnashdi. Panelda tadbirkorlar ehtiyojlariga mos bank xizmatlarini rivojlantirish, raqamli xizmatlar va individual yondashuvni uyg‘unlashtirish, shuningdek, kreditlash jarayonlarida shaffoflikni ta’minlash masalalari muhokama qilindi.
Mikro, kichik va o‘rta biznesni moliyalashtirish dasturining hamkor banklaridan biri sifatida «Hamkorbank» ATB mikro, kichik va o‘rta biznes subyektlarining moliyaviy resurslardan foydalanish imkoniyatlarini kengaytirish hamda tadbirkorlikni qo‘llab-quvvatlashga o‘z hissasini qo‘shmoqda.
