OATB «HAMKORBANK»DA SEMINAR-TRENING
06.05.2013
2 daqiqa
Joriy yilning 4 may kuni «Hamkorbank» tizimidagi boshlang’ich jamoat tashkilotlari xodimlari uchun seminar-trening bo’lib o’tdi. Respublika «Kamolot» YoIH Markaziy Kengashining katta majlislar zalida o’tkazilgan mazkur tadbir «Bank rivoji hamda xodimlarning faol hayotiy pozitsiyaga ega bo’lishida jamoat tashkilotlarining roli va o’rni» mavzuiga bag’ishlandi. Unda «Hamkorbank» boshlang’ich jamoat tashkilotlari bo’lgan kasaba uyushmasi, xotin-qizlar qo’mitasi hamda «Kamolot» YoIH boshlang’ich tashkilotining filiallardagi yetakchilari ishtirok etdilar.
Mazkur tadbirda O’zbekiston Respublikasi xotin-qizlar qo’mitasi boshqarma boshilig’i D. Alimdjanova, O’zbekiston Kasaba uyushmalari federatsiyasining katta yuristi O.G'aynazarov, «Kamolot» YoIH Markaziy Kengashi boshqarma boshlig’i A.Ro'zimurodovlarning interfaol usuldagi ma’ruzalari tinglandi. Yig’ilganlarni qiziqtirgan barcha savollarga mutaxassislar batafsil javob berdilar. Shuningdek, seminar-trening ishtirokchilarnig har biriga o’z yo’nalishini yanada rivojlantirish yuzasidan tavsiya va qo’llanmalar hamda tarqatma materiallar taqdim etildi.
Tadbirning madaniy dasturi Muqimiy nomli respublika teatrida «Jaydari kelin» spektakli namoyishi bilan yakunlandi.
Seminar-trening qizg’in bahs-munozara va faol ishchanlik ruhida o’tgani bilan ahamiyatli bo’ldi.
